Бериќет

Ние втевме, втевме, втевме... и джавата се падна кај мене!

Земја на грујоста

Живееме во земјата на грујоста

Штетник

Човек да се избезуми. Да се вџаши и долго да седи зачуден, замислен.

Како е тоа можно? Како е можно некој толку добро да ти глуми, да проектира една слика за себе во општеството, а всушност да биде дијаметрална спротивност од сликата што ја создава?

Можно е. Можно е затоа што тоа е човечки да веруваш во добро, да се залажуваш, да посакуваш да се случи нешто добро и покрај тоа што насетуваш дека нема така да биде.

http://constant0in.blogspot.com/2015/01/blog-post_26.html 


Јас лично добивав напад на двоумење секој пат кога ќе видев интервју со овој човек, па си викав: Можно ли е овој човек да не е свесен за тоа што се случува во државата? Можеби е изолиран во своето опкружување и до него не стигнува вистинската слика за тоа што се случува? (како во приказната со Царот што посакал да купи јаболка па сите, вклучувајќи го и него беа лажани за вистинската цена на јаболката). Но не, не било така. Груевски не само што имал увид во сите работи што се случувале - тој ги раководел. 

Одвратно е да се чуе со колкав садизам, реваншизам и омраза Премиерот на државата зборува дека штетата што била нанесена на објектот Космос, на Фијат Цановски е ситна. Одвратно е да се слушне како Премиерот на Р. Македонија, во разговор со Миле Јанакиевски, спомнувајќи го Фијат Цановски го ословува со Ф.Т. (претпоставувам Фијат Торбешот). Значи ли тоа дека Премиерот на Р. Македонија сака да навреди некого во однос на неговата национална припадност? А ако се земе предвид дека Торбешите официјално се сметаат како Македонци, поточно Македонци Муслимани. тогаш нели може да се сфати и како навреда и разнебитување на македонската нација однесувањето на Премиерот? 

А што е со лагите дека Македонија е лидер во регионот по разни основи? Па сега слушам како истиот тој Премиер во приватна комуникација кажува дека „не сме најлоши„ во регионот.

http://www.mkd.mk/makedonija/politika/zaev-kako-gruevski-i-janakieski-go-nadgleduvaa-urivanjeto-na-kosmos-na-fiat

Да, јас се срамам од човекот кој за да се одржи на власт ја жртвува македонската демократија. Не му верувам и не верувам во релевантноста на изборите што тој ги организира. Имам право на тоа.

Ако е толку убеден дека има сигурна поддршка од народот, тогаш зошто Премиерот да не прифати релаксирање на состојбите во државата со нови парламентарни избори организирани од техничка, независна или од Влада составена од праведни луѓе на кои сите им веруваме?

Се плаши ли дека ќе ги изгуби тие избори? А драга ли му е Македонија, нејзината иднина, мирот во Македонија? Одговорете си сами.

Картите се на маса, маските се паднати. Сега е битно тие што ја поддржувале ДПМНЕ до сега, а немаат директна корист од тоа, да почнат да размислуваат барем како неутралци; па на тој начин да спласне антагонизмот што се раѓа помеѓу ДПМНовците и сите останати.

На крајот на краиштата треба да се разбере дека партиите и нивните лидери се менливи и минливи, и сега прашањето не е во тоа дали сме за ДПМНЕ или за СДСМ. Не.

Прашањето е: како да излеземе од оваа состојба во која не донесоа и двете спомнати партии.

Прашањето е: дали ќе можеме да го сочуваме мирот и да ја вратиме демократијата во Македонија.

Срам за МАНУ

Претседателот на МАНУ, академикот Владо Камбовски во својата последна изјава дадена во име на организацијата што ја предводи изјави дека очекува Јавното обвинителство, Судот и другите институции да ја доведат работата за очигледно стореното кривично дело неовластено прислушување до правна разврска. Ова, според првиот човек на Академијата, Владо Камбовски, не треба да се смета за нивно молчење туку за став, во ситуација кога нема на располагање доволно факти.

- Вистината за фактите мора да се појави само во  судска постапка. Секоја друга вистина е релативна. Вистината на медиумите, вистината во поединечните кажувања треба да ја прифатиме со резерва. Судската постапка е таа која обезбедува, низ една контрадикторност, низ едно соочување на сите факти, да се стигне до правната вистина, кажа Камбовски.

Со ваквиот свој став академиците од МАНУ го покажаа опортунизмот кој што владее со нив. Тие покажаа дека немаат свое достоинство и не чувствуваат одговорност за општеството што им ја доверило почеста да се изјаснуваат како членови на Академијата; за општеството кое ги делегирало да бидат негова совест и персонификација на сите морални и етички стандарди спрема кои тоа треба да се ориентира.

МАНУ не ја оправда целта на своето постоење: насочување на општеството спрема општочовечките стандарди кои не се запишани во ниеден закон, затоа што законите не можат да ја дефинираат честа и совета, за нив не може да се пресуди во суд ама тие може да се спознаат и осетат... И уште да болат. Да. Честа боли кога ја имаш, кога ја чувствуваш... и кога самиот ја губиш, и кога ти ја газат.

Очигледно е дека организацијата што ја предводи Камбовски западна во сенилност: ниту спознава, ниту чувствува. Со тоа што се ограничуваат само со барањето на правна разврска за најголемите злоупотреби направени од страна на носителите на одговорни јавни функции и со најеклатантните примери на газење на правата на граѓаните на Р. Македонија, членовите на МАНУ се прогласија за непотребни на ова општество.

Да се каже, дека вистина е само тоа што ќе биде резултат на судска одлука, во случај кога поголем дел од државниот врв го има узурпирано правото и законитоста во државата, ги држи под окупација другите столбови на власта претставува морален пад на членовите на МАНУ.          

http://telma.com.mk/vesti/manu-ochekuva-sudska-razvrska

Пинокио на распит

Која е таа странска служба која ги прислушувала македонските граѓани?

Ние знаеме која разузнавачка служба е тоа. Тоа е тајна странска разузнавачка служба. Сепак ние сè уште се договораме која е. Треба да одбереме конкретна држава и да посочиме конкретен човек или група луѓе. Тоа е тешко, ќе мора да ги жртвуваме односите со таа држава. Мислам дека одговорив на тоа прашање - да не се повторувам. А може и нешто погрешно ќе кажам, па ќе имате дополнителни прашања.

Каде е Министерката?

Министерката е во тајност и ќе излезе во јавност тогаш кога ќе процени дека треба да излезе; и кога заеднички ќе го процениме тоа. Освен тоа, ќе видиме и кој тоа нарачува и што нарачува кај новинарите.

Ама...

Нема „ама„! Така одлучив.

На каков начин се вршело прислушувањето?

Откога предавничката опозиција откри дека шурува со странски разузнавачки служби, МВР покани врвни експерти за оваа проблематика од позната тајна странска компанија, која со своја тајна опрема изврши тајна проверка и утврди дека дури и сега, кога неговата активност е откриена, повремено, на различни локации, главно во центарот на Скопје, непознатиот сторител врши нелегално прислушување и снимање на телефонски разговори, користејќи мобилна опрема чија локација постојано се менува. Опремата функционира по принцип на клонирање на, таканаречени, базни станици. Тој прави брза промена на местоположбата, како боксер, во радиус на 2 километри од институциите, од каде ги лоцира телефоните на државниот врв и носителите на јавни функции. Опрема ја приклучува во одреден дел од денот, најчесто помеѓу 12 и 18 часот.

МВР има и писмен извештај за наодите кои произлегоа од работата на врвните експерти од познатата тајна странска компанија, но тој извештај нема да ви го покажам, затоа што тој е таен. МВР досега не успеа да го лоцира сторителот, заради што истрагата за оваа работа сеуште не е завршена, се чека сторителот или повторно да тргне во акција или да се договориме кој е тој.

Што е со домашните соработници на странската тајна служба?

Домашните соработници на странската тајна служба; тие кои ѝ потпомагаа во прислушувањето, па после тоа снимениот материјал го преведуваа на англиски и го испраќаа кај нарачателот; се фатени и признаа скоро сè, а и уште ќе признаат сè што треба. Истражните органи ќе го истражат тоа. Што се однесува до веродостојноста на сите снимки пласирани во јавност, неа ќе ја утврдиме во текот на постапката. Ќе видиме што од тоа е точно, што полуточно а што не е точно. И за тоа така одлучив.

Во Македонија сите прислушувале со години, а само УБК не знаела. Што прави УБК сега?

УБК го слуша народот. И во посилни и поголеми држави се случувало истото – мора да го слушнеш народот за да видиш што сака.

Инаку морам да кажам и дека во Македонија никогаш не се снимале ниту пак ќе се снимаат телефонските разговори, освен доколку нема оправдана потреба за снимање. И за тоа одлучувам јас.

Што ќе им порачате на македонските граѓани?

Државата е нападната од странска разузнавачка служба – време е да го жртвуваме здравиот разум. Наш план е да се бориме со факти и со аргументи за ова што ѝ се случува на нашава држава. Со наши факти и аргументи. Јас не сум човек кој функционира под закани и уцени – неприфатливо е да калкулирам со партиските интереси на сметка на националните и државните интереси.

Премиер сум, верувајте ми. Морате.  

Грујокио

5% расипана интелигенција

Патуваат по Македонија (платени од народни пари), држат антинародни народни трибини на кои не го слушаат народот, туку го делат на свој и на туѓ и раскажуваат евтини историски приказни со кои го учат својот народ што да мисли. Ги пропагираат своите излитени, лажни вистини и го величаат својот паднат ангел како единствен и безвременски Бог.
После тоа пишуваат невини коментари во стилот: Само војна да нема.
Е да, овие клиенти и платеници на режимот ги расчистија нејаснотиите еднаш за секогаш и се обележаа самите како ненормален дел од општеството. 5% расипана интелигенција.

За овие „интелектуалци„ пишував и тука: http://b-n-z-r.blogspot.mk/2015/02/blog-post_5.html

Ни треба restart во Safe mode

Пријатели мои. Сонародници мои. Македонци.
Ние, сите заедно, цела држава, здружено, одиме во амбис, во пропаст, во крах.

Во овој свој пост ќе напишам за нештата што го вознемируваат сето мое битие. Од дното на душата сакам да го прочитате текстов целосно и да размислите над тезите што ќе ги поставам.

Веќе не можам спокојно да ги примам информациите кои секојдневно допираат до мене. Така се чувствуваме најверојатно сите, затоа што сме сведоци дека во нашата држава се случува нешто неординарно. Се случува сè поголема поларизација на општеството, се случува разнебитување на македонското национално ткиво. Македонците стануваат сè позакрвени помеѓу себе. Омразата, навредите и провокациите се сè поприсутни во социјалните и во јавните медиуми. Тие се кажуваат и директно и меѓу редови. И едните и другите кажуваат дека вистината е на нивна страна и дека нивните политички опоненти и наштетиле или сè уште и нанесуваат штета на државата. 

Очигледно е дека двете македонски најголеми политички партии ја донесоа државата во ќорсокак. Во тој ќорсокак може да се случи голема трагедија – семакедонски судир. Судир во кој нема да има победник помеѓу нас. Сите ќе бидеме поразени. Ќе настанат немири и конфронтации, можат да настанат пресметки и егзекуции, ќе бидат загубени човечки животи. Тие што ќе преживеат на секаков начин ќе сакаат да се иселат од Македонија затоа што економијата ќе биде уништена а имиџот на државата засекогаш погазен. Возможно е во таквата состојба на слабост на државата некоја странска земја да почувствува погоден момент и под кој било предлог да окупира дел или цела територија на нашата држава. Возможно е да ја изгубиме државноста. Сето ова е возможно, мислам дека сите се согласуваме за тоа. Несогласиците се јавуваат кога почнуваме да се обвинуваме меѓусебно за тоа кој е виновен. И двете страни имаат свои докази врз кои ја темелат вината на спротивната страна.

Сметам дека за да се релаксира состојбата, за да се изнајде безбеден излез за сите, потребно е да се реализира сет на мерки. Секоја мерка ќе ја елаборирам посебно:

1. Носење на закони и мерки за релаксација на односите;

На сите ни одговара да се релаксира притисокот кој може да доведе до експлозија. Сакаме да ги решиме недоразбирањата мирно, или можеби не?

Овие закони треба да ги донесат пратениците и да покажат барем трунка одговорност за иднината на државата.

2. Распуштање на парламентот;

Парламентот веќе нема кредибилитет. Голем дел од пратениците не се во законодавниот дом а и тие што се во него не ги претставуваат граѓани, туку партиите што ги ставиле на листа. Тие не ја контролираат Владата, туку Владата ги контролира нив. Освен тоа разоткриено е криминално однесување на сите пратеници, во овој, а веројатно и во претходните парламентарни состави. Пратениците добиваат нереално големи средства за покривање на надоместоците на трошоци за користење на автомобили во лична сопственост за службени цели, сумите доаѓаат до 20 илјади евра годишно. Во членот 31 од Законот за пратеници, меѓу другото, стои дека пратеникот освен правото на лично примање има право и на надоместок на трошокот за користење на автомобил во лична сопственост за службени цели. Освен тоа што надоместоците се нереално големи мора да се обрати внимание и на следната реченица во горепосочениот закон: „И тоа во висина од 30% од продажната цена на еден литар гориво, според изминатиот километар за возилото кое се користи„. Значи, средствата што му се исплатени на пратеникот што добил, да речеме, 20 илјади евра како надомест на трошокот за користење на автомобил во лична сопственост за службени цели, се само 30% од вкупната потрошена сума. По таа математика излегува дека целата потрошена сума од страна на пратеникот била 66 илјади 667 евра, па ако собранието надоместило 20 илјади евра, произлегува дека пратеникот потрошил 46 илјади 667 евра годишно, или 3889 евра месечно од свои пари, и тоа при личен доход од некаде 1700 евра. Излегува дека пратениците работат со месечна загуба од некаде 2200 евра?

Ова е криминал. Пратениците, тие што би требало да ја чуваат, тие ја крадат својата држава.

3. Распуштање на Владата;

Во моментот двете најголеми политички партии во Македонија, односно нивните лидери, до Јавното Обвинителство на Република Македонија имаат доставено кривични пријави за дела казниви по закон. Едната страна, СДСМ, во кривичната пријава против лица претставници на Власта, утврдува дека Извршната власт незаконски влијае врз другите столбови на власта во државата, меѓу тие столбови е и Судската власт, па би било етички обвинетата страна (Владата) да се повлече (да се распушти) за да покаже дека одлуката (одлуките) на Судската власт ќе биде (бидат) независни, тоест донесени без притисоци.

Премиерот во неколку наврати има изјавено дека не се држи за власта по секоја цена, сега настана моментот тој тоа и да го докаже. Но, јас го имам слушнато и како кажува дека македонската опозиција (ненародна опозиција!; предавничка, шпионска опозиција!) и нејзиниот лидер немаат капацитет да ја водат државата и дека ќе ги распродадат националните интереси, и дека на Македонија ѝ треба нова опозиција. Таа изјава ми личи на размислување на некој цар кој бара наследник за престолот - едниот син не му е многу сериозен, па тој чека да порасне помалиот син и да седне на престолот.

Го молам Никола Груевски да покаже доблест и големина, па ако навистина поддршката на граѓаните за него, и за неговата партија, е толку голема како што покажуваат разните анкети – тој со леснотија ќе ги добие наредните избори, ќе си го обели образот и ќе ја спаси државата од возможен меѓуграѓански судир.

4. Избор на парламент составен од праведници;

На македонското општество му требаат заеднички именители. Луѓе во коишто верува целото општество. Луѓе со голем кредибилитет, без дамки во биографиите. Луѓе што не членуваат (и не членувале?) во политички партии. Луѓе кои веќе постигнале многу за Македонија.

Таквите луѓе треба да ги предложат независни групи граѓани (претходно да ги замолат за нивна согласност). Да се разбереме – задачата што ќе стои пред нив ќе биде многу одговорна. Тие треба да бидат совест на Републиката. Верувам дека можеме да избереме 100тина такви луѓе.

Овој парламент ќе има скратен мандат, претпоставувам дека една година ќе биде доволна. Парламентот треба да ги донесе следните акти.

a)    Прекин на преговорите со Грција; (прашање кое нема решение а сите владини гарнитури го користат за свои цели)

b)    Закон за санкционирање на случаите на вработување по партиска или непотистичка основа; (основен проблем поради кој во Македонија не се искористува максимално човечкиот квалитет и потенцијал а создадено е непродуктивно општество)

c)    Закон против манипулација со медиумите; (овој демократски контролен механизам е узурпиран. Тоа предизвикува раздор меѓу граѓаните)

d)    Потврдување на основите на граѓанската држава; (сите граѓани се еднакви помеѓу себе, тоест имаат исти права и обврски пред законот; сите партии се еднакви помеѓу себе)

e)    Носење на закон за ревизија на сиот досегашен криминал, вклучително и тој направен за време на приватизацијата на државниот имот; (еднаш треба да се исчисти сето ѓубре од под тепихот)

f)     Ослободување на пратениците од стегите на партиите преку промена на гласачкиот систем од пропорционален во мнозински или барем во пропорционален со отворени листи; (Ни требаат слободни пратеници што ги претставуваат граѓаните)

g)    Закон против манипулации со граѓанските организации; (и овој контролен механизам е узурпиран од политичките партии)

h)   Создавање услови за нормални, демократски парламентарни избори; (прочистување на избирачкиот список...)

5. Избор на експертска Влада;

Парламентот составен од праведници; или да го наречеме Парламент на националната доверба ќе избере влада составена од експерти од разни области, членовите на новата Влада може да имаат членство во било која политичка партија. Премиерот на Владата треба да биде од редот на праведниците.

6. Во судските инстанции на Република Македонија на независен и непристрасен начин да се процесираат започнатите судските постапки;
7. Да се спроведат демократски парламентарни избори на кои ќе учествуваат сите регистрирани политички партии;
8. Да го оставиме сето што ни се случи позади себе, како лош сон; но да направиме сè тоа да не ни се повтори никогаш повторно.

Ова е алгоритам за дејствување, таков каков што употребува оперативниот систем на еден компјутер во ситуација кога ќе се случи неочекуван крах на системот. Тоа е повторен почеток на сигурносен начин. Тоа ни треба – restart во Safe mode.